ዲ.ዩ፤ ታሕሳስ 19/2016 ዓ/ም (ህ.ዓ.ግ)፦ በዲላ ዩኒቨርሲቲ ማሕበረሰብ አገልግሎትና አጋርነት ዳይሬክቶሬት አዘጋጅነት በጌዴኦ ዞን ከሚገኙ ሁለተኛ ደረጃ ትምህርት ቤቶች ለተወጣጡ የኬሚስትሪ መምህራን በኬሚስትሪ ቨርቹዋል ቤተ ሙከራ ዙርያ ስልጠና መሰጠቱ ተገልጿል።

አቶ ተካልኝ ታደሰ፣ የዲላ ዩኒቨርሲቲ ማሕበረሰብ አገልግሎትና አጋርነት ዳይሬክቶሬት ዳይሬክተር፣ ለትምህርት ጥራት መሻሻል የሁሉንም ባለድርሻ አካላት ርብርብ እንደሚፈልግ ጠቁመው፤ መረጃዎች እንደሚያሳዩት በዞኑ ከጊዜ ወደ ጊዜ የተፈጥሮ ሳይንስ ዘርፍን የሚመርጡ ተማሪዎች ቁጥር እየቀነሰ መምጣቱን አንስተዋል። ይህን ክፍተት ለማስተካከልና በአጠቃላይ የትምህርት ጥራትን ለማሻሻል ዲላ ዩኒቨርሲቲ የበኩሉን ሚና ለመወጣት የተለያዩ የግንዛቤ ማስጨበጫ ስልጠናዎችን በመስጠት ላይ መሆኑንም አስረድተዋል።

ስልጠናውን የወሰዱት መምህራን ያገኙትን እውቀትና ልምድ ወደየትምህርት ቤታቸው ሲመለሱ ተግባር ላይ እንዲያውሉት የአደራ መልእክታቸውን አያይዘው አስተላልፈዋል።

አቶ አለማየሁ ገናታ፣ የጮርሶ ወረዳ ትምህርት ጽሕፈት ቤት ኃላፊ በበኩላቸው፤ ስልጠናው የዘመኑን ቴክኖሎጂ መሰረት ያደረገ በመሆኑ በትምህርት ቤቶችና በወረዳው የነበረው የቤተ-ሙከራ የግብዓት ችግር በማቃለል የሚያበረክተው አስተዋጽኦ ከፍተኛ እንደሆነ ገልጸዋል። ሰልጣኞችም ከስልጠናው ባገኙት እውቀት በየትምህርት ቤቶች በሚገኙ ኮምፒውተሮች የተለያዩ ሶፍትዌሮችን በመጫን የተለያዩ ሙከራዎችን ለመስራት የሚያስችል አቅም እንደተፈጠረላቸው አውስተው ዲላ ዩኒቨርሲቲ እንዲህ ያሉ ስልጠናዎችን በመስጠት እያደረገ ያለውን እገዛ አመስግነው መሰል ስልጠናዎች ተጠናክረው እንዲቀጥሉ ጠይቀዋል።

አቶ ብሩህ ተስፋሁን፣ በዩኒቨርሲቲው ማሕበረሰብ አገልግሎትና አጋርነት ዳይሬክቶሬት የአጫጭር ስልጠናዎች አስተባባሪ የማሕበረሰብ አገልግሎትና አጋርነት ከሚሰራቸው አንኳር ተግባራት አንዱ የግንዛቤ ማስጨበጫ ስልጠና መስጠት መሆኑን አስታውሰው፤ በኬሚስትሪ ቨርቹዋል ቤተ ሙከራ በቂ እውቀትና ልምድ ባላቸው የዲላ ዩኒቨርሲቲ ኬሚስትሪ መምህራን ለሶስት ቀናት ሲሰጥ በነበረው ስልጠና ከጌዴኦ ዞን ጮርሶ ክላስተር ከሚገኙ ስድስት ሁለተኛ ደረጃ ትምህርት ቤቶች የተውጣጡ የኬሚስትሪ መምህራን ተሳታፊ መሆናቸውን አሳውቀዋል።

አቶ ብሩህ አክለው፤ ስልጠናውን አሳታፊና ተግባር ተኮር በማድረግ ሰልጣኝ መምህራን ወደየትምህርት ቤታቸው ሲመለሱ ያገኙትን እውቀትና ልምድ ለተማሪዎቻቸው የሚያስተምሩበት የሙከራ እቅድ ማዘጋጀታቸውን ገልጸዋል።

ስልጠናውን ከወሰዱ መምህራን መካከል ትታይ አሸብር እና ጥበቡ ሰለሞን በሰጡን አስተያየት፤ ተማሪዎችን የተለያዩ ሙከራዎችን ለማሰራት ከኬሚካል ጀምሮ ከፍተኛ የሆነ የግብዓት እጥረት ይገጥማቸው እንደነበር ጠቅሰው፤ አሁን በወሰዱት ስልጠና በትምህርት ቤታቸው የሚገኙ ኮምፒውተሮች ላይ የኬሚስትሪ ቨርቹዋል ቤተ ሙከራ ሶፍትዌርን በመጫን ስርዓተ ትምህርቱ የሚያዘውን የተግባር ትምህርት ሁሉ ተማሪዎቻቸውን ለማሰራት የሚያስችል እውቀትና ክህሎት መያዛቸውን ተናግረዋል።

የህዝብና ዓለም አቀፍ ግንኙነት ዳይሬክቶሬት

ዲላ ዩኒቨርሲቲ

የአረንጓዴው ምድር ዩኒቨርሲቲ

Telegram: https://t.me/dprd9

Email: pirdir@du.edu.et

p.o.box: 419