ዲ.ዩ፤ ሐምሌ 22/2016 ዓ/ም (ህ.ዓ.ም)፦ በክረምት ልዩ የአቅም ማጎልበቻ ስልጠና ለመውሰድ ዲላ ዩኒቨርሲቲ ለተመደቡ የ2ኛ ደረጃ ትምህርት ቤት ርዕሳነ መምህራን እና የመምህራን የስልጠና አጀማመር ገለፀ (Orientation) ተሰጥቷል።
ችሮታው አየለ (ዶ/ር)፣ የዲላ ዩኒቨርሲቲ ፕሬዝዳንት በመርሐግብሩ ላይ ባደረጉት ንግግር፤ የተጀመረውን የትምህርት አጠቃላይ ሪፎርም ለማሳካት መምህራንና የትምህርት ቤት አመራሮች የማይተካ ሚና እንደሚጫወቱ ጠቁመው፤ በአገር አቀፍ ደረጃ የሚሰጠውን የአቅም ግንባታ ስልጠና በተሳካ ሁኔታ በመስጠት ዲላ ዩኒቨርሲቲ የበኩሉን አስተዋፅኦ ለማበርከት ዝግጅቶችን አጠናቆ ሰልጣኞችን ተቀብሎ ይህን የማስጀመሪያ መርሐግብር ከትምህርት ሚኒስቴር ጋር በመተባበር ማከናወኑን ገልጸዋል።
ሰልጣኞች የዩኒቨርሲቲ ቆይታቸው መልካምና ውጤታማ እንዲሆንላቸው ፕሬዝዳንቱ መልካም ምኞታቸውን ገልጸዋል።
ታምራት በየነ (ዶ/ር)፣ የአካዳሚክ ጉዳዮች ምክትል ፕሬዚዳንት በበኩላቸው፤ ዲላ ዩኒቨርሲቲ በመምህራን ትምህርት በርካታ ባለሙያዎችን ያፈራና በቂ ልምድ ያለው መሆኑንን አውስተው፤ በአሁኑ ስልጠና ከደቡብ ኢትዮጵያ ክልል የተውጣጡ 505 መምህራንና የትምህርት ቤት አመራሮች ከትምህርት ሚኒስቴር በዲላ ዩኒቨርሲቲ መመደባቸውን ተናግረዋል።
አቶ ገብሬ ነጋሽ፣ የትምህርት ሚኒስቴር ተወካይ በበኩላቸው፤ እንደ ሀገር በዚህ ዙር 52 ሺህ የሁለተኛ ደረጃ መምህራንና 8 ሺህ የትምህርት ቤት አመራሮች በአጠቃላይ 60 ሺህ ሰልጣኞች በ28 ዩኒቨርሲቲዎች ስልጠና እንደሚወስዱ ጠቅሰው፤ መምህራን ለ120 ሰዓት በተማሩበት ሙያ፣ በትምህርት ስነዘዴ በሶሻል ሳይኮሎጂና ዲጂታላይዜሽን እንዲሁም የትምህርት ቤት አመራሮች ለ60 ሰዓት በትምህርት አመራር፣ በሶሻል ሳይኮሎጂና ዲጂታላይዜሽን ስልጠና ወስደው በተከታታይ ምዘና 30 ከመቶ እንዲሁም በትምህርት ሚኒስቴር በሚዘጋጀው ፈተና 70 ከመቶ ውጤት ተይዞላቸው በድምሩ 70 ከመቶና ከዛ በላይ ውጤት ለሚያመጡት ሰልጣኞች የእውቅና ሰርተፍኬት እንደሚሰጣቸው አቶ ገብሬ አስገንዝበዋል።
በመርሐ ግብሩ ዓብይ አህመድ (ዶ/ር)፣ የኢፌዴሪ ጠቅላይ ሚኒስትር እንዲሁም ብርሃኑ ነጋ (ፕሮፌሰር) የኢፌዴሪ ትምህርት ሚኒስትር፤ ለሰልጣኞች በቪዲዮ ኮንፈረንስ አማካይነት መልዕክት አስተላልፈዋል።
ዲላ ዩኒቨርሲቲ፤
የአረንጓዴው ምድር ዩኒቨርሲቲ
የህዝብና ዓለም አቀፍ ግንኙነት ዳይሬክቶሬት

ለወቅታዊ መረጃዎች
Facebook:
https://www.facebook.com/Du.edu.et
Telegram: https://t.me/dprd9
website: https://www.du.edu.et
Email: pirdir@du.edu.et